Nagkutaw og gatas para sa anak gipatay

CEBU, Philippines — Patay  ang usa ka amahan dihang kini gipusil  sa sulod  sa iyang panimalay sa wala pa mailhing armadong mga lalaki diha sa Sitio  Masulo,  Barangay  Basak, Dakbayan sa Lapu-Lapu alas-2 pasado ang takna  sa Lunes sa hapon.

Ang biktima mao si Jaymar Carpintero, 27, apan adunay kapuyo ug nagtrabaho sa usa ka establisamento sa Mactan Export Processing Zone sa maong dakbayan.

Si  Police Chief Master  Sergeant Romeo  Cabras sa kapolisan sa Presinto 4  sa Lapu-Lapu City  Police Office (LLCPO) miingon nga nagkutaw og gatas alang sa iyang anak  ang biktima sa dihang kalit misaka ang duha  ka mga lalaki ug gipaulanan kini og bala.

Matud pa ni Cabras nga ang  amahan  sa biktima nga si  Jaime Carpintero mitug-an nga naglingkod ra siya sa gawas sa dihang nakadungog siya og butobuto  sa armas.

Sunod niining nakita ang duha ka lalaking nagbitbit og armas nga dali-dling migawas sa balay sa biktima, samtang nakita niya ang anak nga nagbuy-od  na sa salog. Unom ka mga basiyo sa bala sa armas  nga kalibre .45 ang  nakuha sa crime scene. Wala pay gibutyag ang kapolisan kun unsy motibo sa maong pagpatay. /IBM (BANATNEWS)