CEBU, Philippines — Patay na nga abtan ang usa ka 61-anyos nga amahan nga naghatud unta og pagkaon sa iyang anak nga napriso diha sa Cebu City Jail sa Barangay Kalunasan, Dakbayan sa Sugbo. Giila ang namatay nga si Osias Dairo, taga Villagonzalo, Barangay Tejero, Dakbayan sa Sugbo kinsa giingong adunay hubak ug hypertension.
Matud ni Police Captain Janelito Marquez, hepe sa Guadalupe Police Station nga si Dairo gitugotan sa nagdumala CCJ nga makahatud og pagkaon sa anak niining napriso.
Giingong si Dairo giatake sa kasing-kasing tungod kay naglakaw lang kini paingon sa CCJ ug samtang nagpaabot nga makasulod nisandig kini sa railings ug kalit lang nahagba ug gitabang usab dayon kini sa medics apan nakabsan na kini sa kinabuhi.
Samtang ang Bureau of Jail Management and Penology sa CCJ male dormitory nipahigayon og e-dalaw o video call sa mga Person Deprive of Liberty (PDL) ngadto sa ilang mga pamilya.
Sa pagkakaron ang video call alang sa mga PDL nga adunay pamilya diha sa laing BJMP jail usa lang una ka computer ang gigamit tungod sa kahinay sa internet diin nagpaabot pa sila nga maabot ang mga modem nga magamit.
Ug gumikan kay dili pa ma-improve kaayo ang internet connection sa maong pasilidad tawag lang una sa telepono ang ilang ihatag sa PDL nga buot makighinabi sa ilang pamilya sa gawas.
Adunay mga guidelines ang ipatuman alang sa pagamit sa tawag diin adunay schedule ang matag dorm ug ang mga PDL kinahanglang magpalista sa opisina sa adlaw sa ilang schedule. Rowena D. Capistrano/BDB (BANATNEWS)