CEBU, Philippines — Giaprobahan sa Department of Labor and Employment (DOLE)-7Central Visayas ang tag P5 mil nga financial assistance ngadto sa 2,154 ka trabahante sa rehiyon nga ubos sa covid-19 Adjustment Measure Program (CAMP).
Ang maong gidaghanon sa mga trabahante gikan kini sa 56 ka mga establisamento.
Matud sa direktor sa DOLE-7 Salome Siaton nga ang mga applicant establishment nakaduso og kompleto nga rekisitos aron maka-avail sa CAMP.
Si Siaton nagkanayon nga kong walay payroll ilabi na sa mga Micro-Small and Medium Enterprises mahimo ra ang pay slip o logbook.
Sa laing bahin, nakaapod-apod na og dul-an sa 3mil ka food packs ang Department of Social Welfare and Development alang niadtong mga kabus nga nawad-an sa trabaho ug tungod usab sa impact sa covid-19.
Si Shalaine Marie Lucero, assistant regional director sa DSWD-7 nagkanayon nga ang maong mga food packs nibalor ngadto ug P1.7milyones diin gi-request kini sa mga local government units.
Samtang ang National Grid Corporation of the Philippines nidonar kini og P1 bilyon ngadto sa nasudnong kagamhanan isip tabang nga matubag ang dugang panginahanglan sa medical equipment ug ubang gikinahanglan batok sa covid-19.
Gikatahong ang P500 milyones sa P1 bilyon igahin sa goods ug medical equipment samtang ang nahabiling P500 milyones gamiton sa pagpamalit sa ubang gikinahanglan sa buhatan sa presidente sa nasud.
Nidonar usab og 500,000 ka face mask ang technical partner sa NGCP nga State Grid Corporation of China pinaagi sa Philippine National Red Cross. /BDB (BANATNEWS)