CEBU, Philippines — Ang PAG-IBIG Fund mopatuman og tulo ka buwan nga Loan Payment Moratorium sugod karon buwana.
Kini tungod kay apektado kaayo ang kita o income sa katawhan tungod sa pagkaylap sa Corona Virus Disease (COVID-19).
Matud sa Information Officer sa PAG-IBIG Fund Cebu Dale Antonio nga tungod sa nasinati nga krisis karon sa katawhan gumikan sa problema sa covid-19 mahimo ra nga dili usa mobayad sa ilang loan o utang ang mga miyembro sulod sa tulo ka buwan ug walay penalty nga ipahamtang niini.
Temporaryo na usab nga gipangisiradohan ang mga opisina sa PAG-IBIG Fund ug wala pa matino kong kanus-a sila mobukas pagbalik.
Ang PAG-IBIG Fund padayon gihapong modawat og loan application bisan sirado ang ilang mga opisina pinaagi sa online diin kinahanglang kompletohon lang ang mga dokumento o rekisitos nga ilakip niini.
Gitug-an ni Antonio nga adunay skeletal forces ang mga pinili nga buhatan sa maong ahensiya aron maoy mo proseso sa mga loan application nga madawat sa online. /BDB (BANATNEWS)