CEBU, Philippines — Gipaabot ang upat ka provincial hospitals nga gidumala sa Kapitolyo nga mao na sad ang mabutangan og Malasakit Center.
Ang Probinsiya sa Sugbo adunay provincial hospital sa Dakbayan sa Carcar, Bogo, Danao ug Lungsod sa Balamban.
Si Senador Bong Go nibistia niadtong Biyernes sa Dakbayan sa Talisay alang sa pagbukas sa ika-69 nga Malasakit Center.
Matud ni Go nga ang pagbutang og Malasakit Centers sa Sugbo pamaagi kini aron moabot ngadto sa kinapobrehan ang tabang sa gobiyerno alang sa panglawas sa mga Sugboanon.
Ang Malasakit Center usa kini ka one-stop shop alang sa tabang medikal ug pinansyal sa mga kabus nga pasyente.
Kini gilangkuban sa Department of Social Welfare and Development (DSWD), PhilHealth, PCSO ug Department of Health.
Sa Sugbo, aduna nay dili mominus lima ka tambalanan nga adunay Malasakti Center sama sa Vicente Sotto Memorial Medical Center (VSMMC), Eversely Childs Sanitarium and General Hospital sa Dakbayan sa Mandaue, St. Anthony Mother and Child sa Dakbayan sa Sugbo ug Lapu-Lapu City Hospital ug ang Talisay City District Hospital. /GMR (BANATNEWS)