PAGCOR modugang sa bahin sa Cebu City

CEBU, Philippines — Gibutyag ni Cebu City Mayor Edgardo Labella nga gipasaligan siya sa usa ka opisyal sa Philippine Amusement Gaming Corporation (PAGCOR) nga dugangan ang  bahin sa gobiyerno sa siyudad gikan sa kita sa mga casino ug offshore gaming operations sa Dakbayan sa Sugbo.

Matud ni Labella nga dihang nagkaestoryahanay sila  sachairperson sa PAGCOR Andrea Domingo usa ka buwan ang nakalabay nipasalig kini kaniya nga bisan og  walay resolusyon gikan sa konseho sa dugangan sa PAGCOR ang gihatag nilang bahin ngadto sa kagamhanan sa siyudad.

“But it’s good that the city council also passed a resolution urging the increase, so that it will not only come from the mayor but also from the council”, pasabot ni Labella.

Sa iyang resolusyon, si Konsehal Renato Osmeña Jr. nagkanayon nga sa mga kita sa operasyon sa casino ang city hall makadawat lang og P4 milyones gikan sa PAGCOR matag bulan.

Ang tabang pinansiyal direkta nga masulod sa trust fund sa siyudad ug ang pagpagawas sa maong pundo subay usab sa guideline sa PAGCOR aron masiguro nga ang pundo nagamit sa katuyoan niini. – Mary Ruth R. Malinao/BDB

Dugang pansayan ipatukod sa Mananga ug Bulacao

Si Mayor Gerald Anthony “Samsam” Gullas Jr. mopahimo og dugang pansayan diha daplin sa sapa sa Mananga sa Barangay Tabunok ug Barangay Bulacao  kon kini gikinahanglan aron ang hugaw sa tawo dili maadto sa sapa nga makamugna og kahugaw nga makatampo sa polio virus.

Si Gullas nimando sa iyang mga sakop sa pagsuroy diha sa lugar sa Mananga ug Bulacao aron susihon ang ilang pagpuyo human nga nahibaw-an nga positibo sa polio virus ang Butuanon River sa Siyudad sa Mandaue.

Giawhag usab niya ang mga ginikanan nga dili kalimtan ang pagpabakuna sa ilang mga anak batok sa polio.

Si Dr. Lino Alanzado, pangulo sa City Health Office nagkanayon nga wala silay problema sa suplay sa vaccine apan wala usab nikompiyansa si Gullas sa pagpangayo og laing suplay aron dili magproblema kong gikinahanglan.

Samtang si Lagrimas Abarquez, pangulo sa Solid Waste Management nagkanayon nga gihimo nila ang monthly clean-up drive sa mga kasapaan.

Gawas niana, ilang isiguro nga kadtong magpataka og labay sa ilang basura masilotan aron kini magmatngon. /BDB (BANATNEWS)