CEBU, Philippines — Nagtinguha ang kagamhanan sa Dakbayan sa Talisay nga masugdan na ang phase 1 sa ugmaron nga boardwalk, food court ug pagpanindot sa plaza sa Barangay Poblacion karong semanaha.
Si Konsehal Rodulfo Cabigas, chairman sa committee on infrastructure, nagkanayon nga andam na ang pundo alang niini apan magdepende nalang kini sa Department of Public Works and Highways.
Nalipay si Cabigas ug ang iyang kaubanan sa konseho kay daghan sab ang nihatag og ayuda sa maong proyekto ilabi na gikan sa mga senador pinaagi sab sa paningkamot ni Mayor Gerald Anthony “Samsam” Gullas Jr.
Si Gullas sa iyang bahin niingon nga makita dinhi ang kanindot na unya sa Poblacion nga maoy sentro sa dakbayan. Asoy pa niya nga gusto siya nga masugdan kini nga walay mga molupyo nga maapektahan.
Napanglantawan ni Cabigas nga mosaka gyud ang negosyo sa lugar tungod kay seguro man gyud nga suroyan kini sa kadaghanan.
Tumong sab niini ang pagbuhi sa negosyo sa inasal nga maoy nag-unang produkto sa siyudad. GMR (BANATNEWS)