Ubang pasahero sa gawas na sa CSBT mag-atang

CEBU, Philippines — Niawhag ang kadagkuan sa Cebu South Bus Terminal sa mga pasahero ilabi na ang mga mosakay og mini-bus nga mas maayo adto gyud sa sulod sa terminal mosakay.

Si Carmen Quijano, manager sa CSBT, nagkanayon nga nahimong suliran karon sa terminal ang mga pasahero nga dili na mosulod sa terminal ug adto sa gawas magtapok ug maghulat sa mga mini-bus.

"Ako gyud gi-announce nga dili mo-allow ang management nga dunay tawo didto nga mosakay i-close door gyud na nato for the reason nga simbako unya mahulog na unya naa sa balisbisan sa terminal, ang tanang accusation ari mag-agi nako," matud ni Quijano.

Kung dili man sa gawas, ang uban adto mag-atang sa atbang sa terminal diin adunay mga mini-bus nga adto na sab mag-atang didto.

"According to them nga less kuno ang bayranan, ang plite gagmay kuno," matud ni Quijano.

Awhag karon ni Quijano sa mga pasahero nga mas maayo mosulod na lang sa terminal aron makalikay sa bisan unsa nga disgrasya.

Sa pagkakaron susama gihapon ang gipatuman nga sistema ug seguridad sulod sa terminal nunot sa gipaabot nga modagsa ang pasahero tungod sa long weekend gumikan kay holiday sa Lunes sa Dakbayan sa Sugbo ug Martes sa tibuok nasud. /GMR (BANATNEWS)

Tejero nangandam batok dengue, CoViD-19

Rowena D. Capistrano

CEBU, Philippines — Gihingusgan sa Barangay Tejero, Dakbayan sa Sugbo ang kampanya batok sa dengue ug nagpahigayon og mga pamaagi aron malikay sa sakit nga Coronavirus Disease (CoViD-19).

Matud ni Konsehal Randy Gorion, chairman sa committee on health sa barangay, nga human sa iyang paglingkod isip bag-ong konsehal ikaduha na kagahapon ang pagpahigayon og misting operation batok sa dengue.

Mapasalamaton si Gorion sa Cebu City Health Department nga gipangulohan ni Dr. Daisy Villa ug sa ilang Barangay Health Workers nga andam moserbisyo sulod sa 24-oras.

Dugang ni Gorion nga mas maayo nga mangandam ug manglimpyo sa kanunay aron malikay sa sakit nga dengue.

Gitug-an ni Gorion nga namalit usab sila sa barangay og thermal scanner, sanitizers, alcohol ug facemasks isip ilang precautionary measures batok CoVid-19.

Si Gorion nibutyag nga matag mosulod sa ilang barangay hall susihon kung wala ba kini gimulo sa iyang kalawasan aron mahatagan usab kini og tambal ug ma-interbyu.

Matud ni Gorion nga namalit lang usa sila sa barangay mintras nagpaabot pa sila mahatagan sa kagamhanan sa dakbayan. /GMR (BANATNEWS)