Nagpasad bas, graba sa SRP, motorista nisarasay
CEBU, Philippines — Daghan ang nisarasay sa karsada human nakaagi sa bas ug graba nga nagpasad sa South Road Properties habig sa Barangay Tanke, Dakbayan sa Talisay sa niaging adlaw.
Gumikan niini si Jonathan Tumulak, traffic czar sa siyudad, niawhag sa mga tawo nga nadisgrasya sa pagpatim-aw sa iyang buhatan aron kahatagan og katin-awan ang nahitabo ug ilang sugdan ang imbestigasyon.
Matud niya nga daghan siya nadawat nga taho sa maong insidente diin pipila nadala na sa tambalanan.
Usa sa mga nadisgrasya nagkanayon nga nakalitan siya sa karsada nga napuno sa bas ug graba hinungdan nga sa iyang pagkumot sa brake nisarasay nalang siya hangtud nga nabagnos sa karsada ug mayo nalang kay walay sakyanan nga nagsunod kaniya.
Apan may nadisgrasya nga nagmotorsiklo sa maong lugar nga giila nga hilan gumikan sa kadaghan na nga panghitabo.
Ang lugar diin nagpasad ang bas ug graba mao ang nagpadayon nga reclamation tapad sa Talisay City Fish Port.
Nagkanayon si Tumulak nga maglisud sila og ila sa mga truck nga nagkarga og bas ug graba apan posible nga ilang matawag ang atensyon sa nagdumala sa reclamation kay mao kini ang sagad nga makita diha sa karsada.
Dili pa lang dugay usa ka unit sa MyBus ang gi-impound human ang gasolina niini nagpasad sa karsada nga niresulta sa pagkadisgrasya sa pipila ka nagmotorsiklo.
Nakabayad og multa ang MyBus ingon man ang drayber niini. /GMR (BANATNEWS)
- Latest