CEBU, Philippines — Gipanghatagan ni Talisay City Mayor Gerald Anthony “Samsam” Gullas Jr. og mga school supplies, bugas ug sardinas ang tulo ka tunghaan ug usa ka barangay nga nisunod sa programang “Basura Mo, Panginabuhi Ko”.
Gilusad ni Gullas ang programa sa niaging tuig aron kini maoy himuon sa mga tunghaan ug kabarangayan aron ang basura nga ilang mahipos mabugtian og kagamitan sa tunghaan ingon man mapahimuslan sa matag pamilya.
Ang mga tunghaan nga gipanghatagan mao ang Jaclupan Elementary School, Bulacao ES ug Jaclupan National High School.
Samtang pito ka sako nga bugas nga gibahin og tag lima ka kilo ug 16 ka lata nga sardinas ang gihatag ni Gullas sa Barangay Tabunok. Si Lagrimas Abarquez, pangulo sa Solid Waste Management Office, nagkanayon nga gituyo ang programa aron pag-aghat sa Talisaynon sa paglimpyo sa ilang palibot. Ang usa ka kilo nga plastik sa basura ilisan og usa ka lata nga sardinas o ba kaha tunga sa kilo nga bugas.
Alang sa mga tunghaan, magbase sila sa puntos nga makuha diin ang usa ka kilo nga basura nga plastik bugti sa 10 ka puntos ug kung mahimo na kining 50 puntos una pa kini ilisan og usa ka set nga kagamitan sa tunghaan.
Nagkanayon ang mayor nga buot nila nga ipatik sa alimpatakan sa Talisaynon nga ang paglimpyo sa basura nga plastik aduna pa kini kapuslan kay mahimo man kini nga i-recycle. –/GMR (BANAT NEWS)