Cebu City mopalit og PPE; Mga kawani sa Talisay gi-seminar

CEBU, Philippines —  Nagpahigayon og special session ang konseho sa dakbayan sa Talisay kalabot sa pagpamalit sa siyudad og mga Personal Protective Equipment (PPE).

Kini ang gibutyag ni Konsehal Dave Tumulak, chairman sa Disaster Risk Management.

Ang PPE gilangkuban sa suit, face mask, tambal nga ihatag sa kabarangayan ingon man sa mga government agencies sama sa Department of Health, Bureau of Immigration ug Bureau of Quarantine.

Lakip usab niini ang traning sa mga Barangay Health Workers (BHWs).

Mokabat ngadto sa P28 milyones ang pundo nga igahin niini nga kuhaon gikan sa disaster funds nga wala magasto gikan niadtong tuig 2015.

Ang maong sugyot ni Tumulak wala pa kini mapasar kagahapon tungod kay ang mga kauban niini sa konseho dunay mga pangutana ug nauwahi usab pag-abot ang mga pipila ka mga resource speaker nga gikinahanglan alang sa maong katuyoan.

Sa laing bahin, kapin sa 2,000 ka kawani sa Talisay City Hall ang gipaubos sa seminar kalabot sa 2019 novel corona virus sugod kagahapon. Si Emily Cabrera, pangulo sa Human Resource Management Office (HRMO) maoy nihangyo kang Dr. Lino Alanzado, pangulo sa City Health Office (CHO) aron magiyahan ang mga empleyado sa ilang buhaton nga malikay sa virus.

Si Alanzado nipahimangno sa mga kawani nga kanunay nga manglimpiyo sa ilang lawas ingon man manghugas usab kanunay sa ilang mga kamot inubanan sa sabon ug alcohol.

Sa nasayran, tulo na ka tawo ang gipaubos sa Person Under Monitoring (PUM) tungod kay gikan sila sa mga nasud nga adunay kaso sa NCoV.  BDB (BANATNEWS)