CEBU, Philippines — Gipahibalo sa Department of Trade and Industry (DTI)-7 nga wala nay stocks sa mga facemask karon dinhi sa Sugbo subay sa gihimo nilang pagsubay kada adlaw nunot niining novel coronavirus outbreak.
Si Regional Director Asteria Caberte miingon nga si DTI Secretary Ramon Lopez nakatutok sa pagpangita og suppliers og facemask aron tabangan ang Department of Health, publiko ug mga health workers.
Gimanduan ni Lopez ang Philippine International Trading Corporation (PITC) nga ubos sa DTI, pagpangita og mapalit nga facemask sa abroad apan bisan didto nahutdan sab og stocks.
Duna hinoon sila’y nakita nga local producer, Med Tech nga makahimo og 80,000 ka facemask kada adlaw ug mipasalig nga motabang sa DTI sa sourcing ug supply.
Nasayran nga dihang gikompirmar sa DOH ang unang kaso sa 2019-Novel Corona Virus sa Pilipinas ang mga tawo namalit dayon og facemask maong nahutdan na og mga baligya niini.
Giawhag sab ni Caberte ang publiko pagsumbong sa ilang buhatan pinaagi sa cellphone numbers 0917-321-5425, 0917-300-5803, ug 0917-300-5807 kun dunay mag-overpricing sa facemask.
Kadtong masakpang nakalapas sa lagda sama sa Price Manipulation pamultahon og P5,000 ngadto na sa P2 million ug 15 ka tuig nga pagkabilanggo samtang kun Price Ceiling violations ang multa naa sa P5,000 ngadto na sa P1 million ug 10 ka tuig nga pagkapriso. IBM (BANATNEWS)