CEBU, Philippines – Ang direktor sa Police Regional Office (PRO)-7 Police Brigadier General Valeriano De Leon mopaimbestigar kabahin sa nahitabong aksidente sa kadalanan diha sa Barangay Basak, Dakbayan sa Mandaue diin giingong wala i-blotter sa kapolisan sa siyudad.
Gipasabot ni De Leon nga bisan og unsa nga disgrasya ang nahitabo ilabi na nga adunay patay kinahanglan gyud kini nga i-blotter.
Nasayran nga adunay proyekto nga gibuhat ang Metropolitan Cebu Water District (MCWD) diha sa lugar diin nabalitok ang motorsiklo nga gimaneho ni Richard Silao human nabulasot sa lungag sa maong proyekto ug ang biktima nalabay kini diha sa karsada ug nakaangkon og grabeng kadaot sa lawas nga hinungdan sa iyang kamatayon.
Sa laing bain, paatay ang usa ka 53-anyos nga lalaki human ang iyang gimanehong motorsiklo nadasmagan og usa ka truck kagahapon sa kadlawaon diha sa South Road Properties habig sa Barangay Sawang Calero, Dakbayan sa Sugbo.
Ang biktima mao si Gerardo Mendoza, taga Dakbayan sa Danao nagmaneho sa motorsiklo samtang ang nagmaneho sa truck nga nakadasmag mao si Alviso Buhat, 28, taga Lungsod sa Barili.
Matud ni Police Major Keneth Paul Albotra, hepe sa San Nicolas Police Station nga si Mendoza ug Buhat parehong gikan sa habagatan ug paingon sa Dakbayan sa Sugbo. Base sa imbestigasyon sa kapolisan nga si Mendoza diha kini sa likod nga bahin sa truck ug giingong kalit kining ni-overtake hinungdan nga nadumbulan ug nalagpot diha sa sementadong pader kilid sa taytayan ug nabunal ang ulo niini diha sa karsada.
Samtang ang pamilya sa 11-anyos nga batang lalaki nga lakip nga nadaro sa taxi ang nidangop sa buhatan sa Land Franchising and Regulatory Board (LTFRB) aron magpakitabang tungod kay naglisod kini sa mga galastohan alang sa biktima. Giingong ang operator sa nahisgutang taxi gamay lang gihatag niining tabang.
Si Christian Dinapo, ig-agaw sa biktima kuyog sa igsuon sa bata ug Barangay Administrator sa Barangay Poblacion Pardo June Berongan nakigtagbo kang LTFRB-7 Assistant Regional Director Rey Elnar aron sa pagpadangat sa ilang reklamo batok sa operator sa maong taxi. Rowena D. Capistrano/BDB (BANAT NEWS)