CEBU, Philippines — Giilang pag-umangkon sa napatay nga gipasanginlang druglord nadakpan ug nakuhaan og kapin P2 milyones nga kantidad sa gituohang shabu sa buy-bust operation diha sa Mantawi Drive sa Barangay Subangdaku sa Dakbayan sa Mandaue.
Si Police Captain Marvin Fegarido , hepe sa Presinto 2 sa MCPO miila sa ilang nadakpan nga mao si Thomrie Jay Llaguno, 30, taga B. Rodriguez sa Dakbayan sa Sugbo ug giingong pag-umangkon ni Crisostomo “Tata Negro” Llaguno nga gipasanginlang druglord kinsa gipatay atol sa pagpangampanya samtang kini nikandidato pagka-konsehal sa Cebu City niadtong 2010 elections.
Si Fegarido miingon nga ang buy-bust operation batok ni Lllaguno nga nahitabo diha sa Mantawi Drive sa Barangay Subangdaku, natigayon human kini gitumbok sa usa ka Vince Lhyle Maglasang,28, nga nadakpan niadtong Domingo sa kaadlawon diha sa Sacris Road sa Barangay Tipolo sa Dakbayan sa Mandaue.
Matud pa ni Fegarido nga giangkon ni Llaguno nga uyoan niini si Tata Negro ug kini mibutyag sa ilang contact nga priso diha sa Cebu City Jail nga tigtransaksyon sa illegal nga drugas.
Ang director sa Mandaue City Police Office nga si Police Colonel Jonathan Abella miingon nga epektibo kaayo ang ilang pagbutang og mga police checkpoints sa kampanya batok illegal nga drugas ug krimen.
Checkpoints
Karon lang buwana, nakasikop sila og 29 ka drug personalities lakip niini kadtong mga tiggamitan og illegal nga drugas nga gikan namalit sa og shabu sa Dakbayan sa Sugbo aron ibaligya sa Mandaue City.
“ Our checkpoints are effective because we arrested those drug personalities who bought illegal drugs in Cebu City and who planned to distribute it here in Mandaue City, ” ni Abella pa sa iyang pamahayag.
Drug Den
Sa laing operasyon nga gihimo sa Philippine Drug Enforcement Agency-7 gironda ang usa ka drug den sa may Barangay Carreta ning Dakbayan sa Sugbo, Domingo sa gabii.
Ang nasikop mao sila si Cerelina Casas, alyas Sherly, target sa operasyon ug drug den maintainer, Regina Casas, Ligie Cadaro, Timotes Pautan, Frederick Amaro, ug Reymundo Abregonda.
Nasakmit gikan sa mga dinakpan ang 12 ka putos sa ginadili nga drugas, cellular phone, kwarta nga dul-an sa P3 mil nga gituohang halin sa illegal ug mga gamit sa pagsuyop.
Matud pa ni Leia Alcantara, tigpamaba sa PDEA7 dul-an sa duha ka semana nilang gipanid-an ang maong drug den.
Tanke
Sa operasyon sab sa Barangay Tanke niadtong Domingo sa gabii nadakpan ang duha ka high value individuals nga silang Eric Steve Cabanes, 37, Marlon Hortillano, 38, ug usa ka Orlando Delima, 37, nga taga barangay Poblacion sa maong siyudad nga giingong nagbitbit og usa ka paketeng gidudahang shabu. IBM (BANATNEWS)