CEBU, Philippines – Mopadala ang Department of Social Welfare and Development 7 og tulo ka teams sa kaulohan aron motabang sa ipahigayon nga psychosocial activity sa mga biktima sa pagbuto sa bulkang Taal sa Batangas ug pagtabang sa warehousing sa ahensiya. Kini ang gitug-an ni Leah Quintana, ang information officer sa DSWD-7, nga nahinabi sa Banat News.
Matud pa ni Quintana nga wala pa sila nagpadala og mga hinabang alang sa mga biktima tungod kay wala pa may request nga nadawat tungod kay aduna pay igo nga supply.
Kini ang hinungdan nga ang ilang ipadala mao ang tulo ka teams nga gilangkuban sa 11 ka tawo diin usa ang lider ug napulo ang miyembro niini nga maoy motabang sa psychosocial interventions o paghatag og stress debriefing lakip usab ang pagtabang sa mga kalihukan sa warehousing sa mga DSWD sa lugar diin apektado sa pagbuto sa bulkan. Dugang pa ni Qunitana nga wala pa hinoon silay tukma nga petsa kung kanus-a molarga ang unang team nga mo-duty sulod sa napulo ka adlaw apan gipaubos na kini sila sa orientation aron sa higayon nga ipadala na kini sila sa maong lugar andam na kini sila sa kanunay.
Gitug-an ni Quintana nga ang tulo ka teams motabang sa lugar nga apektado sa pagbuto sa bulkan sulod sa 30 ka adlaw tungod kay tag 10 ka adlaw man matag team. /GMR (BANAT NEWS)