Random checkpoints masinati sa Talisay

CEBU, Philippines — Daghan nga random checkpoint ang masinati sa mga motorista nga moagi sa Dakbayan sa Talisay gumikan sa kasaulogan sa kapistahan sa Balaang Bata nga si Senyor Santo Niño.

Si Police Chief Master Sergeant Merian Roble sa Talisay City Police Statio nibutyag nga kagahapon pa lang gisugdan na nila ang ilang pagsita sa mga motorsiklo sa Barangay Linao, Bulacao ug sa utlanan sa South Road Properties (SRP) sa Barangay Tangke.

Sumala pa niya nga mas subson pa ang checkpoint karong adlawa ug ugma.

Matud ni Roble nga kini ang usa sa paagi nga makatabang sila sa paghatag og seguridad sa kalihukan sa Siyudad sa Sugbo.

Sigun pa niya nga magpadayon gihapon ang ilang pagpatrolya sa kadalanan aron kung adunay mga panghitabo dali lang marespondehan ilabi na sa interior nga bahin.

Gipangkatag sab ang mga dagway sa mga kawatan, tulisan ug mga kriminal pinaagi sa paghatag og flyers aron makatabang ang katawhan sa pag-report dayon kung naa man silay makit-an nga dautang elemento. /GMR (BANATNEWS)