CEBU, Philippines – Ang tanang mag-uuma sa Probinsiya sa Sugbo buot ni Gobernador Gwendolyn Garcia nga mahatagan na og insurance ubos sa Philippine Crop Insurance Corporation (PCIC). Kini human sa pagkusokuso sa bagyong Ursula niadtong niaging tuig diin nibiya kini og lapad nga kadaot sa pananom ug panagat.
Atol sa gipahigayong tigom tali sa ubang department heads sa Kapitolyo gimandoan ni Garcia ang provincial agriculturist nga si Roldan Saragena nga mohimo og timetable aron mapaubos sa insurance ang tanang mag-uuma ug mananagat sa probinsiya.
Base sa report ni Saragena ngadto kang Garcia nga niabot ngadto sa 29,908 ka mag-uuma ang adunay insurance ubos sa Cebu Provincial Government Insurance Program nga nikabat ngadto sa sa P1 bilyon walay labot sa livestock tungod kay ubos kini sa Provincial Veterinarian’s Office. Si Garcia nangutana kang Saragena kong naapil ba sa maong insurance ang mga mananagat sa Daanbantayan ug ang mga isla niini sa Carnaza ug Malapascua lakip ang mga mananagat sa Lungsod sa Medellin.
Gibutyag ni Saragena nga wala maapil sa insurance ang mga mananagat.
“In your next report, give me a timetable kanos-a mahurot nato og insured ang atong farmers and fisher folks. Di na pwede, itagsa-tagsa na sila, kinahanglan na sila ma-organize into an association”, matud ni Garcia sa report sa Sugbo News ang official news portal sa Provincial Information Office sa Sugbo.
Ang Lungsod sa Medellin, Daanbantayan apil ang Isla sa Bantayan maoy labing naapektohan sa bagyong Ursula. /BDB (BANAT NEWS)