CEBU, Philippines — Nabangalan ang patay’ng lawas sa usa ka habal-habal driver sa mga sakop sa City Disaster Risk Reduction and Management Office sa Dakbayan sa Danao nga gikatahong missing sa gabii sa pagsugat sa Pasko.
Ang biktima giila nga si Jonathan Canggas, 31, taga Barangay Togonon sa maong dakbayan, kansang patay’ng lawas gidagsa sa Awihao Dam sa maong dakbayan alas 11 sa buntag kagahapon.
Si Police Staff Sergeant Arnold Labine sa Danao City Police Station niingon nga alas 4 sa hapon niadtong Disyembre 24 ang biktima giingong nakig-inom uban sa iyang mga higala.
Nipauli kini alas 6 sa gabii ug gikataho nga wala na nahidangat sa ilang panimalay sa adlaw sa Pasko hinungdan nga gitaho kini sa iyang pamilya sa CDRRMO sa dakbayan.
Gituohan nga ang biktima gianod sa kusog nga sulog sa suba sa Barangay Togonon atol sa pag-igo sa bagyong Ursula.
Si Canggas maoy gikataho nga unang natala nga nakalas atol sa pag-igo sa bagyong Ursula pipila ka oras sa dili pa ang Pasko. /GMR (BANATNEWS)