CEBU, Philippines — Walo ka mga job order ug casual nga empleyado sa Cebu City Hall ang gikatakdang mawagtangan og trabaho human sila nagpositibo sa gipahigayon nga kinalit nga drug test sa mga tinugyanan sa Cebu City Office on Substance Abuse Prevention kon COSAP.
Matud pa ni Atty. Rey Gealon, pangulo sa Cebu City Legal Office, morekomendar sila sa buhatan ni Mayor Edgardo Labella sa pag terminate sa maong trabahante human kini sila nagpositibo sa ginadili nga drugas.
Dugang pa ni Gealon, ilaha nang gihatag ang tukma nga due process batuk sa maong mga trabahante diin duha niini ang niadmitar nga tiggamitan ug ginadili nga drugas.
Sumala pa ni Gealon, ang walo nga girekomendar alang sa pagkataktak sa trabaho mao ang duha gikan sa Mayor’s Office nga casual nga empleyado, duha ka mga job order worker aa Department of Social Welfare and Services nga naka pwesto sa buhatan ni Vice Mayor Michael Rama.
Lakip pa usab sa girekomendar alang sa termination mao ang duha ka J.O. sa City Assessors Office, casual employee sa Peace and Order Program, Department of Public Services ug Office of the Civil Registrar.
Gitug-an ni Gealon ang maong mga trabahante dili mahimo magpadayon sa City Hall nga usa unta ka drug free environment nga gitinguha sa mayor sa dihang kini ang nangamahan sa Drug Test Ordinance niadtong 2004.
Ang pangulo sa COSAP Jonah John Rodriguez, nitug-an nga nagpaabot pa sila sa uban pang mga resulta sa gipahigayon nilang drug test. (BANAT NEWS)