CCPO andam na kini alang sa seguridad sa mga simbahan

CEBU, Philippines — Ang Cebu City Police Office (CCPO) andam na alang sa seguridad sa simbang gabi diha sa mga simbahan sa Dakbayan sa Sugbo.

Kini ang gibutyag sa hepe sa operation branch sa CCPO Police Lieutenant Colonel Allan Madrid Rosario diin matud niya nga nakaandam na ang kapolisan sa dakbayan alang sa deployment sa mga police personnel ngadto sa mga simbahan gawas sa mga station personnel.

Kini tungod kay adunay uban nga mga police station nga daghan og simbahan ug kinahanglan nga dugangan og pwersa hinungdan nga mokuha sila og personnel gikan sa CCPO headquarters.

Gawas usab niini, adunay ipamutang nga public assistance desk diha sa gawas sa simbahan nga adunay mga police personnel aron adunay dali maduolan ang publiko kong adunay mga kakulian o krimen nga mahitabo sa lugar.

Adunay K9 dogs usab ang ipakatap sa mga simbahan aron sa pagsiguro nga luwas ang mga manimbahay.

Giawhag ni Rosario ang publiko ilabi na sa motambong sa simbang gabi nga kinahanglan nga siguradohon nga sirado ang ilang balay o adunay mahibilin aron gili mabiktima sa kawat.

Nikabat usab ngadto sa 31 ka simbahan ang natala sa CCPO sa Dakbayan sa Sugbo nga maoy hatagan nila og seguridad.  BDB (BANATNEWS)