Tanang LGUs sa Sugbo pahimoon og lakang batok ASF

CEBU, Philippines — Giawhag ni Gobernador Gwendolyn Garcia ang mga local government units sa probinsiya nga mohimo na og lakang batok sa African Swine Fever (ASF) nga hulga sa hog industry sa Sugbo.

Atol sa tigum sa Anti–ASF Task Force sa Lalawigan sa Sugbo, nasayran nga 28 pa ka LGUs ang adunay executive order.

Naglakip kini sa Sibonga, Argao, Dalaguete, Boljoon, Oslob, Santander, Aloguinsan, Balamban, Asturias, Tuburan, Tabogon, Tabuelan, Daanbantayan, Bantayan, Medellin, Catmon, Carmen, Compostela, Liloan, Pilar, Tudela, Cordova, Ginatilan, Toledo City, Mandaue City, Lapu-Lapu City, Cebu City ug City of Naga.

Ang uban nga wala sa listahana ang giawhag sa gobernador nga mohimo og executive order aron mas molig-on ug adunay klaro nga lakang aron maseguro nga walay makasulod sa Probinsiya sa Sugbo nga baboy o produkto sa baboy nga magdala og ASF nga risgo sa P11 bilyones nga hog industry sa Sugbo.

Si Jerome Gonzales, provincial director sa Department of Interior and Local Government, nagkanayon nga mosuwat siya ngadto sa mga LGUs karong adlawa nga wala pay balaud o executive order nga mohimo na og lakang. /GMR (BANATNEWS)