CEBU, Philippines – Malaumon si Cebu City Medical Center Administrator Yvonne Feliciano nga third quarter sunod tuig magamit na ang unang tulo ka andana sa nagpadayon giugmad nga tambalanan.
Matud ni Feliciano nga aduna na silay pagtugot sa Department of Health nga mahimo na kini nilang magamit.
Sumala pa ni Feliciano nga kung unsa karon ang kasamtangan nga set-up sa CCMC mao usab kini ang ibalhin sa bag-ong tulo ka andana aron magpadayon ang ilang serbisyo ngadto sa mga pasyente.
Ilang tinguha nga mapasayon ang serbisyo ug aduna na silay mga kausaban nga nakita ilabi na sa ilang fast lane para sa mga dinakpan nga magpa-medical diin dili na kini molanat og pipila ka oras nga magpaabot aron masuta ang ilang kahimtang una ibalhug sa prisohan.
Si Feliciano niawhag sa katawhan sa pagsinabtanay lang gyud sa kanunay ilabi na sa mga gipatuman nila nga alang sa kaayuhan sa tanan. /GMR (BANAT NEWS)