Pagpasiga sa mga Christmas Tree naoktaba
CEBU, Philippines — Gipang-oktaba ang pagpasiga sa mga higanteng Christmas Tree gumikan sa bagyong Tisoy.
Gani ang mga sakop sa Cebu City Parks and Playgrounds Office ang padayong nagtrabaho bisan sa uwan.
Niadtong Lunes ra unta ang pagpasiga sa dakung Christmas Tree sa Plaza Sugbo, Plaza Independencia, Fort San Pedro ug Senior Citizen’s Park.
Hinoon ang pangulo sa maong buhatan nga si Engineer Editha Peros nipasalig nga luwas ang ilang mga trabahante nga nagtrabaho bisan pa sa uwan.
“Kulba gamay pero safety ra gihapon ang mga trabahante kay naka harness pud sila, anad na sila anang trabahoa kay mao gyud na ilang trabaho, gamay ra pud sila, gipangpili gyud na mga highly-skilled,” matud ni Peros.
Sa Dakbayan sa Mandaue, hingpit na nga mapasiga ang ilang Christmas Tree karong gabii human kini wala nadayon niadtong Lunes.
Magsugod na usab ang matag gabii nga kalingawan sa City Heritage Park sa dakbayan diin nahimutang ang maong Christmas Tree.
Si Mayor Jonas Cortes ug Bise Mayor Glenn Bercede maoy mangulo sa ceremonial lighting alas 9 karogn gabii. (/GMR)(BANATNEWS)
- Latest