P9.6 milyones drugas sakmit; Tulo sikop sa Cebu City ug Talisay

CEBU, Philippines — Nikabat ngadto sa P9.6 milyones ang balor sa shabu nga nasakmit atol sa managlahi nga buy bust operation sa City Drug Enforcement Unit (CDEU) sa Cebu City Police Office (CCPO).

Sa Barangay Calamba nasikop sa kapolisan si Romjol Diaz, 20, nagpuyo sa maong lugar ug giingong sinaligan sa usa ka drug lord.  Matud sa hepe sa CDEU Police Lieutenant Colonel Frankie Jingle Vea Lugo nga si Diaz usa kini ka sinaligan ug huloganan og ilegal nga drugas sa usa ka drug lord kinsa anaa karon sulod sa prisohan.

Si Diaz mao usab ang mo-distribute sa mga drug pusher sa Sugbo ug giingong maka-dispose kini og kinilo nga drugas matag semana.

Nakuha gikan sa posisyon ni Diaz ang 1.1 kilo nga shabu diin nibalor tanan ngadto sa P7.5 milyones.

Samtang sa Barangy Duljo Fatima nasikop sa kapolisan s Mambaling Police Station si Elmer Segara Apor, 27, habal-habal driver, lumad nga taga Mindanao ug temporaryo nga nagpuyo sa maong lugar.

Matud sa hepe sa Mambaling Police Station Police Captain Francis Renz Talosig nga nakadawat sila og impormasyon kalabot sa ilegal nga kalihukan sa suspetsado.

Nakuha gikan sa posisyon ni Apor ang 315 gramos nga shabu nga nibalor tanan ngadto sa P2.1 milyon es.

Sa laing bahin, nasikop sa kapolisan sa Dakbayan sa Talisay ang usa ka 18-anyos nga giingong drug addict sa niaging adlaw diha sa merkado sa Barangay Tabunok.

Natingkagol sa detention cell sa Talisay City Police Station si Anthony Bacarisas, residente usab sa maong lugar kinsa giingong nasakmitan og pito ka paketeng shabu.

Samtang ang kagamhanan sa Dakbayan sa Mandaue nagtinguha nga hingpit nang ma-drug cleared sa tuig 2020 ang siyudad.

Ang siyudad nigahin kini og P10 milyones alang sa ilang kampaniya batok sa ginadiling drugas diha sa kabarangayan.

Si Konsehal Nerissa Soon-Ruiz nagkanayon nga andam sila nga mohatag og suporta sa panginahanglanon sa kabarangayan sa kampaniya niini batok sa ilegal nga drugas.

Dugang ni Ruiz nga naglakip sa programa nga gipasiugdahan mao ang community support, aftercare, ug reintegration sa mga drug surrenderee. (/BDB)(BANATNEWS)