CEBU, Philippines – Nagsugod na ang Department of Trade and Industry (DTI)-7 sa pagsusi sa mga Christmas light nga gipamaligya sa mga nagkadaiyang tindhan sa Metro Cebu.
Ang maong lakang sa ahensiya kabahin sa ilang pamaagi aron masiguro nga walay mga substandard nga mga Christmas light nga ibaligya.
Gibutyag ni Ines Cajegas, pangulo sa Consumer Protection Division sa DTI-7 nga sugod sa niaging semana naghimo na sila og schedule ug kagahapon niadto sila sa nagkadiyang siyudad sama sa Danao, Lapu-lapu, Mandaue, Talisay ug Cebu City ug nihimo og inspection sa mga gipamaligya nga Christmas light.
Matud ni Cajegas nga importante nga masusi ang Christmas lights gumikan kay naglamgbigit kini sa seguridad sa mga mamalitay.
Giingong ubang Christmas lights nga substandard ang usa sa hinungdan sa mga insidente sa sunog. Si Cajegas nipahinumdum sa mga mopalit og Christmas lights nga dili magpahaylo sa presyo pilion gyud kadtong Christmas lights nga adunay marka nga Philippine Standard (PS) ug ICC nga marka.
Aron magsiguro i-download lang sa mamalitay ang ICC verification system sa play store aron ma-scan nila ang mga Christmas light tungod kay sagad sa Christmas lights karon aduna na kini QR code.
Ang maong application namugna sa Bureau of Philippine Standard sa Manila niadtong buwan sa Pebrero ug karon magamit na ug user friendly usab kini. (/BDB) (BANAT NEWS)