CEBU, Philippines — Mayor nga nalakip sa listahan sa mga narco-politician ni Pres. Duterte gidakop kagahapon sa hapon sa Mactan Cebu International Airport samtang kini padung mosakay balik sa Mindanao human kini gireklamo og pagpangulata ug paghimo og malaw-ay sa sud sa usa ka massage parlor dinhi sa Dakbayan sa Sugbo.
Ang mayor mao si Clarin, Misamis Occidental Mayor David Navarro kinsa gireklamo sa usa ka John Dueñas nga masahista ug laing usa ka babayeng masahista sa usa ka massage parlor diha sa Fuente Osmeña Circle.
Matud ni Police Major Edward Sanchez hepe Abellana Police Station midangop sa ilang buhatan si Dueñas ug misumbong nga kini gikulata sa suspek.
Gisaysay ni Dueñas nga nisulod ang mayor sa massage parlor ug nangita’g babayeng masahista apan kay daghan sila og kustomer walay bakanteng babayeng masahista nga makaserbisyo sa mayor.
Giingong nasuko kini ug nanghagit nga andam kini mohatag og P500 hangtud P1000 kung dunay lalaking momasahe kaniya apan kinahanglang makigsukmagay kini kaniya.
Anang tungora migawas si Dueñas tungod nagpakitabang ilang kauban, apan wala siya masayod sa hagit sa mayor. Dihadiha giingong gikuptan kini sa mayor ug sa kauban niini ug gikulata. Ang pagdagmal nakuha sa closed-circuit television. Dugang pa ni Sanchez nga human kulataha sa mayor si Dueñas padayon kini sa pagsaba-saba ug pagsige og hasi sa sud maong naahat paghatag og babaye nga masahista apan giingong gipaduwaan sa mayor ang iyang kinatawo sa babayeng masahista kinsa mireklamo sab sa kapolisan.
Ang maong mayor giingong adunay gitambongang kalihokan dinhi sa Sugbo.
Matud pa ni Sanchez tungod kay dunay mireklamo ug wala mopatim-aw sa ilang buhatan ang mayor bisan gipahibalo bahin sa reklamo gipangita kini ug nasayran nga nibiya na kini padung sa airport.
Daling gitawgan ni Sanchez ang PNP-Aviation Security Unit ug gisikop kini.
Ang mayor gidala pagbalik sa Cebu City nga nakaposas ug gikuhaan og mugshot suot ang orange t-shirt nga dunay markang PUPC (person under police custody).
Ang mayor sa iyang bahin nanghimakak sa mga pasangil batok kaniya ug nibutyag ang iya nalang ang abogado ang motubag bahin sa uban pangutana.
Apan iyang giklaro nga igo ra niyang gikuptan ang maong lalaking masahista kay gibastos siya niini ug giingnan og dili maayong mga pulong.
Ang kapolisan nagpreparar na og kasong acts of lasciviousness ug physical injury batok sa mayor.
Niadtong Marso 15, 2019 usa si Navarro sa gipublikar ni Duterte nga mga mayor nga nalambigit sa illegal nga drugas. IBM (BANAT NEWS)