PNP nakasab-an ni Duterte

CEBU, Philippines — Ang natudlong officer-in-charge sa Philippine National Police miangkon nga nakasab-an gyud sila ni Presidente Rodrigo Duterte ug giingnan silang nasubo kini sa kontrobersya nga gikalambigitan sa kapulisan bisan og gihatag na niini ang tanan nga mga panginahanglanon lakip usab ang pagtaas sa ilang sweldo.

Si Police Lt. General Archie Francisco Gamboa, gitudlo ang OIC sa PNP naabot sa Sugbo alang sa turnover of command ceremony kagahapong adlaw diha sa Police Regional Office-7. Siya maoy nihulip kang PNP Chief Oscar Albayalde kinsa opisyal untang moretiro karong Nobiyembro 8 ning tuiga apan sayong nanaog sa pwesto nunot sa kontrobersiyal nga Ninja cops nga gikalambigitan sa iyang 13 ka mga kanhi sakop didto sa Pampanga Provincial Police Office samtang siya pay hepe didto niadtong tuig 2013.

Matud pa ni Gamboa atol sa ilang closed-door conference kanila ni Duterte sa nilabay nga adlaw nasubo og maayo ang presidente.

Daw namuyboy ang pangulo kay kay gihatag na niini ang tanan ngadto sa kapulisan sama sa ilang capability enhancement program kung diin kanhi P6 bilyones lang sa matag tuig, apan karon P26 bilyones na ang gihatag kanila. Tungod sa maong pundo daghan na silang mga nindot nga patrolcars, mga armas, napulo ka helicopters lakip ang pagpasaka sa ilang sweldo.

Sumala pa ni Gamboa, makita gayud nila sa panagway sa presidente ang kasubo ug kasagmuyo.

Isip OIC PNP Chief, iyaha kining gitan-aw nga dakong hagit aron pakintuhon ang iyang mga sakop aron magtarong sa ilang trabaho, kini bisan pa og limitado lang ang panahon nga siya posibleng mahulipan dayon kun may matudlo ng bag-ong PNP Chief ang presidente.

Apan sa pagkakaron aduna kini gahom mopalagpot, motudlo ug mosilot sa mga badlongong sakop.

Si Gamboa nga PMA Class 86 ug classmate ni Albayalde kwalipikado sa maong posisyon, apan andam siyang mosuporta kun kinsay pilion ni Duterte. (BANAT NEWS)