Pagpamutol sa kahoy sa Naga gipahunong

CEBU, Philippines – Temporaryo nga gisuspenso ang pagpamutol og mga kahoy sa Dakbayan sa Carcar ug Naga sa Department of Public Works and Highways.

Kini human sa tigum nga gipatawag ni Gobernador Gwendolyn Garcia uban nilang Carcar City Mayor Mercedita Apura ug Naga City Mayor Vanessa Chiong ug mga opisyal sa DPWH ug Department of Environment and Natural Resources.

Si Chiong nagkanayon nga wala unay operasyon nga himoon karon subay sa himoong reassessment sunod semana sa mga kahoy nga nameligrong maputol alang sa road widening project sa DPWH.

Matud ni Chiong nga i-assess sa DENR ang kondisyon sa mga century old trees nga anaa sa highway samtang ang DPWH mo-reassess sa proyekto nga ilang gipatuman sa maong dapit.

Si Garcia nagkanayon nga sulod sa duha ka semana himoon ang maong assessment pinaagi sa tabang sa Provincial Environment and Natural Resources Office.

Pagsuta kini sa kahoy kun maayo pa ba kini o gabok na sa ilawom ug peligro nga matumba.

Human sa reassessment una pa modesisyon kun idayon o dili ang pagpamutol sa maong mga kahoy sa Dakbayan sa Naga.

Matud ni Garcia nga wala pay giisyu nga permit sa pagpamutol sa kahoy sa Dakbayan sa Carcar kay wala pay gigahin nga pundo alang sa road widening project. Dili mominus 32 ka kahoy sa Dakbayan sa Naga ang apektado. (/GMR)(BANAT NEWS)