CEBU, Philippines — Nikabat ngadto sa P238 mil ang balor sa ginadiling drugas ang nasakmit gikan sa duha ka suspetsadong pusher kinsa nasikop atol sa gipahigayong buy bust operation sa mga ahente Philippine Drug Enforcement Agency (PDEA)-7 niadtong Biyernes sa gabii diha sa Paradise 3, Barangay Kinasang-an, Dakbayan sa Sugbo. Ang nasikop mao si Baby Rose Rama, 28-anyos ug Mae Villanueva, 30-anyos, parehong walay mga trabaho ug residente sa maong lugar.
Ang PDEA-7 nipahigayon sa maong operasyon human nakadawat og impormasyon sa giingong ilegal nga kalihukan sa mga suspetsado.
Nasakmit gikan sa maong mga suspetsado ang tulo ka putos nga shabu nga nitimbang ngadto sa 35 gramos nga nibalor og P238 mil base sa Dangerous Drug Board Value, usa ka cellphone ug dul-an sa P3 mil nga kwarta nga gituohang halin sa ginadiling drugas.
Matud pa ni Leia Albiar-Alcantara, tigpamaba sa PDEA-7 nga sulod sa usa ka semana ang gipahigayon nilang pagpaniid batok sa mga suspetsdo.
Gibutyag ni Alcantara nga mga suspetsado maka-dispose kini og 300 ngadto sa 500 gramos nga shabu matag semana.
Ang mga suspetsado mag-atubang og kasong kalapasan sa Section 5 in relation to Sec 26 ug Sec 11 sa Article II sa Akta Republika 9165 kun “Comprehensive Dangerous Drugs Act of 2002”. (/BDB)(BANATNEWS)