CEBU, Philippines — Gitataw sa Provincial Health Office nga wala pay kaso sa polio nga ilang na-monitor sa Probinsiya sa Sugbo.
Kini human nga adunay nag-outbreak sa duha ka lugar sa nasud lakip niini ang Davao.
Matud ni Dr. Cristina Giango, hepe sa PHO nga dili angay maghulat nga adunay motumaw nga kaso sa polio.
Giango niawhag sa publiko ilabi na sa mga ginikanan nga adunay bag-ong mga anak nga pabakunahan kini batok sa polio.
Gibutyag ni Giango nga mas daghan ang nagpabukana karon batok sa polio base sa record sa PHO sukad niadtong buwan sa Enero hangtud sa Hunyo karong tuiga.
Base sa datos sa PHO nga anaa sa 70.50% o 26, 086 ka masuso ang nakapabakuna sulod sa unom ka bulan karong tuiga.
Ang PHO adunay target nga 36,999 ka bata nga mabakunahan karong tuiga.
Dugang ni Giango nga tulo ka dosage ang kinahanglan nga bakuna sa bata aron makompleto ang iyang anti-polio vaccine.
Ang unang dosage sa bakuna ihatag sa masuso nga nagpangidaron og usa ka bulan og tunga, ikaduhang bakuna inig mag-edad na og duha ka bulan og tunga ug ang ikatulong bakuna ihatag uban sa inactive polio vaccine kong ang bata nagpangidaron na og tulo ka bulan ug tunga. (BDB) (BANATNEWS)