2 persons of interest sa nipusil patay sa negosyante
CEBU, Philippines — Duha ka tawo ang giisip karon nga person of interest sa Mabolo Police Station sa pagpatay sa usa ka magpapatigayon nga si Jeffrey Gomonit, 49, lumad nga taga Ramon Magsaysay, Zamboanga Del Sur.
Kini ang gitug-an ni Police Capt. Dexter Basirgo, hepe sa Mabolo Police Station.
Ang biktima kasamtangan nga nagpuyo sa PMG Pension House sa Felisita Village, Barangay Looc, Mandaue City.
Sakay kini sa iyang Montero Sports nga adunay plate number NLO 647, dihang gipusil sa may Pope John Paul Avenue atubangan sa usa ka dakung mall sa North Reclamation Area niadtong Domingo sa alas 9 sa gabii. Matud sa kapolisan nga ang biktima padulong kining mo-U-turn sa eskina A. Soriano Street ug Pope John Paul Avenue padulong unta sa Cabahug Street sa dihang gisikitan sa duha ka lalaki nga nag-motor nga nagmaskara ug naka-bonnet dayung pusil sa makadaghan sa may driver’s side. Ang biktima nakaangkon og samad pinusilan sa iyang ulo ug sa kilid nga bahin sa iyang lawas hinungdan sa iyang hinanali nga kamatayon
Tulo ka kabhang ug usa ka bala ang nasakmit sa crime scene sa wala matino nga armas de fuego.
Sa initial nga kasayuran sa kapolisan gikan sa pamilya nga gikan sa usa ka tigum ang biktima ug padulong na unta kini mokuha sa iyang pamilya.
Sumala pa ni Basirgo nga subayon nila ang gigikanan sa biktima aron ilang makita ang mga tawo nga posibleng nagsunod niini. Dugang ni Basirgo nga usa sa ilang gitutukan ang posibleng usa sa mga kanhi business partners samtang nagpadayon ang ilang pagpalawom sa imbestigasyon. (GMR) (BANATNEWS)
- Latest
