Hustisya gipanawagan sa pamilya sa gipatay nga manaygonay

CEBU, Philippines —  Hustisya maoy gipangita sa pamilya sa gipatay nga managsilingan nga mga lalaki nga giingong igo lang nanaygon sa PUJ apan napalgan na lang nga nagligdas ang ilang patay’ng lawas sa bakanteng luna sa Sitio Capasanan, Casili, Dakbayan sa Mandaue.

Ang mga biktima giila sa ilang mga kabanay nga sila si Ryan Tañaga, 25, ug Stephen Balbuena, 24, pulos nagpuyo sa Punta Princesa, Dakbayan sa Sugbo.

Gitug-an sa mga kabanay ngadto sa kapolisan sa Presinto 6 sa Mandaue City Police Office nga naandan na nga gihimo sa duha ang pagsakay sa PUJ sa pagpanaygon sa mga pasahero.

Nakapatingala kaayo ngadto kanila nga nahidangat ang duha sa awaaw nga lugar sa Barangay Casili nga patay na ug ang ilang ulo, liog ug dughan ang nakabaton og samad pinusilan.

Giangkon sa pamilya nga ang duha ka biktima pulos walay trabaho.

Matud ni Police Corporal Cyrus Buot sa Presinto 6 sa MCPO sa Barangay Canduman nga giila sa mga kabanay ang patay’ng lawas sa duha sa punerarya sa Rolling Hills Funeral Homes sa dalan A.S. Fortuna sa Barangay Banilad, Dakbayan sa Mandaue.

Sa crime scene maoy napalgan sa kapolisan ang tulo ka kabhang sa kalibre .45 nga gituohan sa kapolisan nga gikan sa armas sa mga wala hiilhing mamumuno nga maoy gigamit sa pagpatay sa mga biktima.

Gibutyag sa mga molupyo sa maong dapit nga ikaupat na kini nga higayon nga adunay patay’ng lawas nga nakaplagan sa maong dapit nga gituohang biktima salvaging. (GMR) (BANATNEWS)