Dugang garbage trucks giabangan sa siyudad
CEBU, Philippines — Aron mas malimpyo pa ang Syudad sa Sugbo, adunay kapin sa 30 nga dugang nga mga garbage trucks ang maglibot sa syudad aron mangolekta sa mga basura.
Gibutyag ni Department of Public Services Head Engr. Joel Biton nga ang Jomara Konstruct Corp. maoy nakadaog sa P25.2 milyon nga kontrata alang sa pagkolekta sa basura sa syudad.
Gawas sa P25.2 milyones nga kontrata sa pagkolekta sa basura ang Jomara aduna say P32 milyones nga hauling contract alang sa final disposal.
Ubos sa mga kasabotan terms of reference, siya miingon nga ang siyudad magbayad og P1,400 matag tonelada sa makolektang basura samtang P1,298 sab matag tonelada sa paglabay niini.
Sumala pang Biton kinahanglan og tabang gikan sa mga pribadong kompanya ang siyudad aron mokolekta ug molabay sa basura tungod kay aduna lamang kini 13 ka mga trak.
Ang Bids and Awards Committee sa syudad mo-award sa P25.2 milyones nga kontrata ngadto sa Jomara karong semanaha.
Dunay empleyado sa city hall nga mag-monitor sa mga trak sa Jomara aron masiguro nga nangolekta gyud sila sa basura. Gikatakda pa usab nga i-schedule ang P190.3 milyon nga bidding sa dugang badyet alang sa pagkolekta sa basura ug paglabay karong tuiga.
Ang siyudad nigahin og dugang nga badyet alang sa pagkolekta sa basura tungod kay gi-review pagbalik ang P232 milyones nga pagpamalit unta og 21 ka mga compactor trucks nga giingong "overprice" sa panahon ni kanhi mayor Tomas Osmeña. Tumong unta ni Osmeña nga mamenusan ang gasto sa pagpangabang og mga trak.
Sa miaging tuig, ang syudad migasto og labing menos P133.67 milyones sa abang sa trak ug P286.8 milyones pagdala sa basura padung sa labayanan. (IBM) (BANATNEWS)
- Latest
