Mga vendors sa Tabunok Public Market gipasidan-an

CEBU, Philippines — Mipasidaan ang mga kadagkoan sa task force sa Barangay Tabunok sa Dakbayan sa Talisay ngadto sa mga vendors sa Tabunok Public Market nga sundon gyud ang mga patakaran aron dili  sakmiton ilang mga paninda.

Si Kapitan Benjie Cabigas miingon nga wala silay mahimo tungod kay ang mga manindahay anha naman sab mohikyad sa ilang paninda sa daplin sa karsada bisan dili unta nila gustong kumpiskahon ilang mga baligya.

Naandan na nga ang Tabunok samok gumikan sa kadagahan sa tawo ug mga sakyanan ilabi na pun-an pa sa manindahay nga miokupar daplin sa karsada.

Apan sa dihang gisugdan ang pagpanghawan nakita ang kausaban.

Si Cabigas miangkon nga gihingusgan nila ang paghawan sa karsada human si mayor Gerald Anthony “Samsam” Gullas Jr. nimando niini ubos usab sa kamanduan ni Presidente Rodrigo Duterte nga ibalik sa mga tawo ang karsada.

Asoy pa ni Cabigas nga bisan paman sa ilang operasyon uban sa task force ug sa City of Talisay-Traffic Operation Development Authority (CT-TODA) aduna gyud pipila nga sila rasab ang bantayan.

Gani ang uban ilang masakpan nga misupak gihapon hinungdan nga sila mapugos sa pagsakmit sa mga paninda niini.

Si Cabigas niingon nga ang ilang gibuhat mao lang ang ipang trabaho nga mao ang tigpatuman sa kahapsay sa lugar. Iyang giangkon nga nakita gyud nila ang kausaban apan siya nanghinaot nga sila suportaan ug sabton sab sa katawhan. (/IBM)(BANATNEWS)

 

Show comments