Teban dad-on karon sa kapitolyo

CEBU, Philippines — Dadon karong adlawa sa Kapitolyo ang haya ni anhing Julian “Teban” Daan.

Mobiya gikan sa St. Peter Funeral Homes sa New Imus Road alas 8:00 sa buntag ug ihapit una kini sa DyHP-RMN Cebu Station sa dili pa isulod si Daan sa Capitol Social Hall alang sa tibuok gabii nga bilar.

Si Daan napiling sakop sa Provincial Board sa unang distrito sa Lalawigan sa Sugbo niadtong 1998, 2001, 2007, 2010 ug 2013 nga eleksyon.

Si Daan unang nag-alagad isip konsehal sa Barangay Tabunok, Dakbayan sa Talisay una pa siya napili nga konsehal sa kanhi lungsod pa sa Talisay niadtong 1987 sa wala pa siya nahimong sakop sa PB.

Nakaalagad sab siya isip bise gobernador niadtong Disyembre 2012 hangtud Hunyo 2013. Human napupos ang iyang termino sa PB niadtong 2016, si Daan napili nga konsehal sa Dakbayan sa Talisay hangtud sa iyang kamatayon.

Misahan si Daan alas 10:00 ugma sa buntag sa Capitol Social Hall ug sundan sa mga pakigpulong.

Alas 12 sa udto ugma si Daan dad-on sa iyang pinuy-anan sa Sangi, Tabunok, Dakbayan sa Talisay diin siya misahan alas 8 sa gabii.

Sa Miyerkules sa alas 7 sa gabii laing misa ipahigayon sundan sa tribute sa St. Peter ug sa tanang kaubanan sa entertainment industry.

Sa Huwebes sa alas 4 sa hapon, si Daan dad-on sa Talisay City Hall alang sa tibuok gabii nga bilar diin dunay misa sa alas 7 sa gabii ug mga pakigpulong.

Alas 12 sa udto sa Biyernes, si Daan misahan sa Talisay City Parish Church ug alas 2 sa hapon ilubong na siya sa Cansojong cemetery.

Kagabii ang kaubanan ni Daan sa DyHP-RMN Cebu nihalad og tribute sa iyang haya sa St. Peter.

Si Daan nailang personalidad sa radyo ug maoy nagmugna sa sikat kaayong drama nga “Kung Ako Ang Pasultihon” matag buntag sa dyHP.

Nisikat siya sa pangan nga Esteban Escudero niadtong drama sa radyo ug telebisyon nga “Ang Manok ni San Pedro.”

Si Daan namatay sa sakit sa kasingkasing niadtong Miyerkules sa hapon sa Chong Hua Hospital sa Dakbayan sa Sugbo. (BANATNEWS)