CEBU, Philippines — Duha ang patay samtang duha sab ang angol sa duh aka aksidente sa kadalanan dinhi sa Sugbo.
Sa Proper Pajac, Barangay Pajac sa Dakbayan sa Lapu-Lapu, usa ka Jeffrey Heredia, 29, ang nakalas samtang duha ang angol human sila giharos og bangga sa usa ka van nga nawagtangan og kontrol Lunes sa kaadlawon,
Ang nagmaneho sa van mao si Orland Cueno, 27, taga West Binabag, Barangay Tayud Consolacion. Ang mga naangol mao sila si Elmer Rafana ug Ruby Rose Agusto, residente sa maong lugar.
Matud pa ni Police Corporal Jay Mark Mullero, Desk Officer sa Police Station 2 sa Lapu-Lapu City Police Office, padulong sa airport si Cueno apan nakatagpilaw kini hinungdan naabot sa pikas linya ang ligid niini apan sa pagbawi niya nadasmagan niya sa mga tawong nagbarug kilid sa dalan nga maoy naingnan sa hinanali nga kamatayon ni Heredia ug niangol nila Rafana ug Agosto.
Ang van nalahos pa gyud sa usa ka panimalay ug sa poste sa kuryente. Ang mga naangol dali nga gidala sa tambalanan, samtang ang nakalas ngadto na sa usa sa mga punerarya sa dakbayan.
Samtang nakalas sab ang usa ka Dativo Riconalla Sr., 78, human kini nadasmagan og motorsiklo sa paglabang niini sa dalan diha sa Barangay Liong, Lungsod sa Dumanjug Sabado sa buntag.
Ang nakadasmag kaniya mao si Jay-R Maquiboten,33, taga Barangay Cogon sa maong lungsod.
Matud pa ni Police Corporal Marlou Sentillas, Traffic Investigator sa Dumanjug Police Station, dulhogon ang dalan nga gilabangan sa biktima mao nga wala kini nakabantay sa nagpadulong nga motor.
Ang biktima gidala sa Barili District Hospital apan gideklarar nga dead on arrival tungod sa kadaut nga naangkon. (IBM) (BANATNEWS)