CEBU, Philippines — Dulan sa 20 ka drug respondents gikan sa nagkadaiyang lugar sa Central Visayas ang nigradwar sa Surrender to God Recovery and Renewal Program sa Archdiocese of Cebu ug sa Love of God Community sa Lungsod sa Liloan, kagahapon sa hapon.
Unom ka adlaw ang maong kalihukan nga gisugdan niadtong adlaw nga Lunes ug gitapos kagahapon pinaagi sa usa ka graduation nga gitambongan sa ilang mga ginikanan.
Ang maong kalihukan gawas sa adunay mga pagtulon-an kalabutan sa drug addiction adunay gipahigayon nga mga drug test diin mahinangpon ang nagdumala niini tungod kay walay nagpositibo sa wala pa ang graduation.
Matud ni Jay-r Reynes, staff sa SUGOD nga sa wala pa ang ilang pagsugod sa training nagpahigayon sila ug drug test ug adunay duha ka nagpositibo ug malipayon sila sa katapusan nga test sa wala pa ang oras sa graduation nga wala nay positibo.
Lakip sa mga nigradwar ang gikan sa Negros Oriental, Cebu City, Toledo ug Probinsiya sa Sugbo.
Si Fe Mantuhac-Barino, executive director sa SUGOD nitug-an nga instrumento lang siya sa maong programa aron sa pagtabang sa katawhan nga naulipon sa drugas nga aduna pa silay kausaban ug paglaom.
Matud ni Barino nga gawas sa SUGOD aduna usab silay recovery program sulod sa Cebu City Jail alang usab sa mga priso kinsa nipaubos sa plea bargaining agreement. (/BDB)(BANATNEWS)