CEBU, Philippines — Ang mga rehistradong senior citizen ug persons with disability sa Siyudad sa Sugbo makadawat na sa ilang financial assistance gikan sa siyudad kon aprobahan sa konseho ang giduso nga ikaduhang supplemental budget sa executive department.
Ang executive department mogamit sa down payment sa mga kompaniya nga nakapalit sa 45.5 ektaryang luna diha sa South Road Properties aron gamiton alang sa P2.5 billion nga Supplemental Budget No.2.
Ubos sa SB-2, giduso ni Mayor Edgardo Labella ang P500 milyones alang sa pagpa-ayo sa traffic system sa siyudad; P455 milyones alang sa financial assistance sa senior citizens; P80 milyones alang sa PWD ug uban pang naa sa capital outlay sa giduso nga dugang budget karong tuiga.
Aduna pay pagahimuon nga budget hearing ang konseho una maaprobahan ang maong SB-2.
Matud ni acting city treasurer Arlene Rentuza nga ang Office of the City Accountant ug laing mga personalidad ang nipirma nga ang P3.5 bilyones nga down payment sa SM, Ayala, ug Cebu Holdings Inc. pwede nang magamit isip source of fund alang sa dugang nga budget.Kahinumduman usab nga ang consortium sa Ayala Land, Cebu Holdings Inc. ug SM Prime Holdings nipalit sa 26.3 ektaryang luna nga kantidad og P10.009 bilyones samtang ang Filinvest Land Inc. nipalit sa 19.2 ektaryang luna sa kantidad nga P6.7 bilyones niadtong tuig 2015.
Sa maong tuig, nibayad ang mga kompaniya og 50 porsyento isip down payment sa maong pagpalit sa luna nga nagkantidad og P8.35 bilyones. (/BDB)(BANATNEWS)