21 ka toneladang basura nakuha gikan sa sapa

CEBU, Philippines — Niabot sa 21 ka toneladang basura ang nahipos sa gipahigayon nga Guadalupe River Massive Cleanup kagahapon sa buntag.

Sa maong massive cleanup nitabang sa paglimpiyo si Cebu City Mayor Edgardo Labella, nagkadaiyang barangay pinangulohan ni Association of Barangay Council President Franklyn Ong, nagkalainlaing buhatan sa Cebu City Hall ug mga police station.

Nasayran nga ang pagpanglimpiyo gisugdan sa siyam ka stations, ang Station 1 mao ang Mohon Bridge, Station 2 ang Haarlemmermeer Bridge, Station 3 ang Velez Bridge, Station 4 ang B. Rodriguez, Station 5 ang P. del Rosario, Station 6 ang Guadalupe Bridge, Station 7 ang Sanciangko Bridge, Station 8 ang Colon Bridge ug ang station 9 mao ang Forbes Bridge.

Matud ni Labella nga mangayo sila og tabang sa mga barangay hinungdan nga karong Martes magpahigayon siya og meeting sa mga barangay diin ipakita nila ang resulta sa pagpanglimpyo.

Ang pangulo sa Cebu City Environment and Natural Resources Office(CCENRO) Atty. John Jigo Dacua nibutyag nga naobserbaran nila ang grabe nga kahugaw sa kasapaan diin sa maong sitwasyon makita ang kakuwang sa disiplina sa mga tawo nga namuyo diha kilid sa mga sapa.

Matud ni Dacua nga samtang nanglimpiyo sila dunay nagsige og labay og mga basura hinungdan nga adunay enforcers nga nagsuroy sa mga balay ug nag-isyu og citation ticket. (/BDB)(BANATNEWS)