P14.3 milyones marijuana gisunog
CEBU, Philippines — Nilampos sa paglarot ug pagdaob sa mokabat sa P14.3 milyones nga kantidad sa marijuana ang kapolisan sa Dakbayan sa Danao inabagan sa Provincial Mobile Force Company human gironda ang duha ka plantasyon sa duha ka bukirang barangay.
Natigayon ang sunod nga operasyon sa kapolisan ubos sab sa koordinasyon sa Philippine Drug Enforcement Agency 7 human natino ang nahimutangan sa plantasyon sa Barangay Licos ug Langosig.
Sa Barangay Licos nadiskubrehan ang 500 metro kwadrado nga luna nga gitanoman og marijuana alas 7 pasado niadtong Martes sa buntag diin kapin sa 10,000 ka punoan ang ilang naibot nga mokabat sa P4.1 milyones samtang 4,000 sab ka seedlings ang ilang gilarot nga mokabat sa P160,000 ang kantidad.
Si Police Lieutenant Colonel Maribel Getigan, hepe sa Danao City Police Station, niila sa mga nadakpan nga sila si Benjie Depositario, 34; Inocentes Depositario, 59; Berting Depositario, 27, ug Melvin Depositario, 30, pulos nagpuyo sa maong dapit ug nasakmitan og .45 kalibre nga pistola nga adunay lima ka bala sulod sa magazine.
Sa Barangay Langosig ang labing daku nga plantasyon sa marijuana nga anaa sa usa ektaryang luna ang gitanom nga 25,000 ka punoan nga balor sa P10 milyones. Matud ni Getigan nga duha ka mag-uuma ilang nadakpan nga giila nga sila si Basalo Acidillo ug Jhosar Acidillo nga pulos anaa sa listahan sa Danao City Police Station nga nalambigit sa ilegal nga kalihukan.
Samtang laing duha ang nakaeskapo nga giila nga sila si Genesis Jaime ug Wendel Jaime. Human sa maong operation, usa ka dialogue ang gihimo ni Police Lieutenant Colonel Rene Sanchez Kyamco, commander sa 1st PMFC, sa lima ka barangay kapitan sa Cambugho, Oguis, Lawaan, Danasan ug Bayabas, bukiran nga bahin sa Dakbayan sa Danao alang sa padayon nga suporta niini sa kapolisan batok sa ilegal nga drugas ug armas.
Si Danao City Mayor Ramon “Nito” Durano III kinsa nitambong sa ceremonial nga pagdaub sa mga nalarot nga marijuana ang niawhag nga pasakaan og kaso ang tag-iya sa luna.(GMR) (BANAT NEWS)
- Latest
