Tunghaan sa Talisay nasunog
CEBU, Philippines — Lima ka mga lawak saringan ug usa ka stock room sa Talisay City Central High School ug elementary ang nakan-an og kayo human ang tinapok nga plastic nga armchair ang nangasunog pasado mga alas 5 pasado sa hapon kagahapon.
Naglisod ang kabumberohan sa pagsud sa lugar tungod kay gamay ra nga firetruck ang mahimo nga makasulod maong gisumpaysumpay nalang nila ang fire hoses.
Si Sr. Insp. Arra Alpajaro, ang fire marshal sa siyudad sa Talisay niingon nga nadawat nila ang alarma mga alas 5:57 sa hapon ug gideklara nga undercontrol human sa 30 minutos nga pakigkumbati sa sunog.
Nagsugod ang kalayo sa dakong hawan sa tunghaan kun diin gibutang ang mga plastik nga armchairs. Dali nga nakadako ang kalayo hinungdan nga nisaka kini ngadto sa mga lawak saringan ug niabot sa ikatulong andana.
Giisa sa kabumberohan sa task force alpha ang alarma gumikan sa kapaspas sa sunog. Nitapon gyud kini sa hagdanan sa maong tunghaan kun diin naa ang mga kinarton nga libro ingon man mga softdrinks gikan sa stockroom. Pasalamat lang si Alpajaro nga walay klase atol sa sunog.
Si Charles Enjambre ug Jonathan Villaver nga residenti sa lugar nitataw nga adunay daw nagdaob sa luyo hinungdan nga nitumaw ang kayo apan susihon pa kini sa imbestigasyon. Gibanabanang P60 mil ang danyos sa sunog base sa nangaguba nga estraktura. (BANAT NEWS)
- Latest
