CEBU, Philippines – Wala gyud ilha sa Commission on Higher Education (CHED) ang mga kurso nga gitanyag sa Mandaue City College (MCC) nga nahimutang sa Basak, Dakbayan sa Mandaue.
Nunot niini giawhag karon ang mga estudyante nga na-enrol nga mobalhin sa mga eskwelahan nga giila sa CHED nga higher education institution (HEIs).
Giklaro sa CHED nga ang gipadagan nga MCC ni Dr. Paulus Mariae Cañete dili konektado sa MCC nga gipadagan sa kagamhanan sa Dakbayan sa Mandaue nga anaa nahimutang sa Mandaue City Cultural and Sports Complex sa Barangay Centro nga gipangulohan ni Atty. Ernesto Maringuran.
Niadtong Hulyo 9, 2019 gipahibalo sa publiko ni CHED Chairman Dr. J. Prospero De Vera III nga wala nay legal nga katungod ug walay pagtugot sa gobiyerno ang operasyon sa MCC ni Cañete.
Matud ni De Vera nga ang mga nigradwar sa maong eskwelahan dili usab tugutan sa pagkuha sa bisan unsang licensure examination sa Professional Regulation Commission (PRC).
Nagmando na ang CHED sa pagpasira sa MCC nga gipadagan ni Cañete niadtong Disyembre 3, 2010 apan giapelar pa ang kaso ngadto sa korte. (/GMR)(BANAT NEWS)