CEBU, Philippines – Gidakop ang upat ka lalaki tungod sa paghimo og mga peke nga dokumento sulod sa usa ka establisemento sa dalan Colon, Dakbayan sa Sugbo kagahapon sa udto.
Giila ang mga suspek nga sila si Felipe Abellanosa, Adel Copacio Jr., Adel Copacio ug Lito Baay. Ang Metro Cebu Highway Patrol Team nga gipangulohan ni Police Captain Saturnino Sedigo niingon nga ang pag-aresto sa upat tungod sa nangaging nadakpan nga may mga peke nga ID sa gobiyerno kinsa sila ang gitudlo nga tinubdan.
“Karon sa pag-imbestiga nato diri nila gitudlo, kini nga establishment. So atong gibuhat sa atong highway patrol nag-conduct ta og test-buy buot ipasabot nagpabuhat ta ug OR/CR na falsified ug driver’s license, so nigawas na tigbuhatay gyud sila so mao nang naduso nato para mag-file tag SW (search warrant),” matud ni Sedigo.
Gipahayag sab ni Sedigo nga ang pag-aresto sa mga suspek nakapaalarma tungod kay kini nga mga dokumento mahimong gamiton sa ilegal nga transaksyon.
“Kini man gu’ng mga falsified documents mao ni pagabuhaton sa mga kawatan og motor, mga sakyanan nga ilang i-falsified,” dugang ni Sedigo.
Si Sedigo nidugang nga ang operasyon paagi kini sa pagsulbad sa carnapping. (/GMR)(BANAT NEWS)