Proyekto sa Kapitolyo nalangan, kuwang sa plano

CEBU, Philippines — Gibutyag sa Commission on Audit (COA) kon nganong nalangay ang mga proyekto sa imprastraktura sa Probinsya sa Sugbo nga moabot sa P422.7 milyones alang sa tuig 2018 ug kini mao ang kakuwang sa detalye ug plano.

Sumala sa COA report, ang kalangay gumikan sa dili igo o kulang nga planning ug pagpahigayon sa "detailed engineering activities." Nasayran nga ang maong pundo gikan sa 20% sa Development Fund.

Pipila sa wala pa makumpleto nga proyekto ubos sa miaging administrasyon mao ang pag-rehabilitate og Level III nga waterwork system sa Ubaub ug Colawin Argao, Poblacion, Boljoon, Alcantara ug Barangay Dagatan ug Basak, Badian.

Apil usab nga padayon pa nga gitrabaho mao ang pagkonkreto sa mga dalan sama sa Mompeller-Balaas (vegetable highway) sa Argao, Nug-as road sa Alcoy, Cañang road sa Samboan, Ilihan-Cal-anan road sa Tabogon, Libertad-Odlot road sa Dakbayan sa Bogo ug uban pa.

Ang Provincial Engineer nagkanayon nga kasagarang masumiter nila nga budget sa matag departamento nga adunay pre-identified infrastracture project apan ang uban mosumiter sa ilang kaugalingong infra projects nga usahay moresulta sa kalangan sa procurement.

Matud usab PEO basi sa COA report, ang problema sa road-right of way nga responsibilidad unta sa mga LGUs maoy usa sa problema.

Ang COA nirekomendar ngadto sa probinsya nga momando sa mga personnel sa concerned department nga siguradohon ang pagpahigayon og detailed engineering atol sa planning ug budgeting process. (DILT) (BANAT NEWS)