CEBU, Philippines — Kun kaniadto nindot kaayong tan-awon ang opisina ni Cebu City outgoing Mayor Tomas Osmeña diha sa 8th floor sa Executive Building sa Cebu City Hall karon mura nalang kini og bakanteng bodega nga wala bisan pultahan.
Gawas pa niana, ang sawog nga tiles nangabuak, wa nay kisame, wa nay inodoro ug banggerahan ang kasilyas niini.
Sumala pa nga gipakuha sa mayor ang tanang mga dapat nga giisip niyang personal nga gipanag-iya niadtong Huwebes sa gabii.
Usa ka construction company ang nipadala og 27 ka mga trabahante ug maoy nanangtang sa mga gamit ug adorno sa maong opisina.
Ang mga trabahante nipakita og certification gikan sa Department of General Services (DGS) nga ang mga brown colored cabinets/shelves/claddings, light ug plumbing fixtures, partitions, pultahan, kisame ug floor works dili iya sa Cebu City Government kondili personal nga gamit nga gipataod ni Osmeña.
“This is to certify that the subject properties (attached pictures of brown colored cabinets/shelves/claddings, light plumbing fixtures, partitions and doors, ceiling and floor works) located at the 8th Floor Cebu Mayor’s Office are not Cebu City Government Owned Properties but are personal properties of former Cebu City Mayor Tomas Osmeña,” nakalatid sa certification sa DGS nga gipirmahan sa ilang pangulo Ronaldo Malacora.
Sa panahon ni kanhi mayor ug karon vice mayor-elect Michael Rama, ang maong opisina mao ang protocol office sa siyudad. Apan pagkadaog ni Osmeña niadtong 2016 Elections gipausab niya kini ug migasto siya og P2 million alang sa renovation ug didto na nag-opisina.
Apan ang incoming City Attorney ni Vice Mayor ug karon mayor-elect Edgardo Labella nga si Atty. Rey Gealon miingon nga wala unta giingon adto ang paghipos o pagtangtang sa mga gamit sa mayor kay mahimo ra man unta og gibalik sa orihinal nga dagway ang maong lawak.
Matud ni Gealon dunay “malicious intent” ang pagguba sa umaabot nga buhatan ni Labella.
“Ang gibuhat man gud nila kay naay mga properties o fixtures didto nga dili na nimo makuha or kanang gitawag nga immovable. Ubos sa balaod pananglitan kanang mga tiles, ang ilang gibuhat sa tiles ilang gi-scrape paghuman og scrape kay dili man nila ma-scrape tanan ilang gibangagan gamit ang jack hammer so wala kay laing ma-impute other than malice sa ilang pagguba adto,” sigon ni Gealon. Ang nahitabo sa maong opisina gipa-blotter ngadto sa Waterfront Police Station.
Ug sa imbestigasyon sa kapolisan, giingong si Raymund Paul Climaco Taboada, executive assistant ni Osmeña ang matud pa ni-assist sa construction firm sa demolisyon sa buhatan.
“Definitely mopasaka ta og kaso sa mga responsable gitabangan ta og imbestigar sa Waterfront Police Station nianhi sila dinhi ug nakisusi ug gani man nakita didto sa CCTV footage ang usa ka personal assistant to the Mayor nga maoy ni-supervise sa demolition didto sa 8th floor,” dugang ni Gealon.
Si Labella sa iyang bahin dihang gipangayoan og komento mao kini iyang tubag, “The ruin of the city mayor’s office is hard to believe. It’s a shocker. But as I reflect on it, perhaps it is no more than a microcosm of the way someone has left an entire city in shambles.”
Apan si Osmeña dihang gikuhaan og pamahayag sa mga tigbalita miingon iyang personal nga kwarta ingon man sa iyang mga higala ang gigamit sa pagpanindot sa maong buhatan nga nagkantidad og P2 million.
Matud niya pagpahinumdom sab kini sa Konseho dihang gidominar pa kaniadto sa Team Rama ang pagbasura sa gipangayo niyang P2 million proposed budget alang sa renovation sa iyang opisina.
“When I became mayor again, I asked the council for P2 million to fix the mayor’s office and they rejected it…I spent for it so I am taking it out. I am restoring it to what it was before,” ni Osmeña pa.
Andam sab si Osmeña kun pasakaan siya og kaso kay duna siya’y ipakitang pamatuod nga Program of Works and Estimates (POWE).
Si Taboada sa iyang bahin miingon nga igo ra siyang misunod sa kamanduan pag-supervise sa pagkuha sa personal properties sa mayor ug pagsigurong wala’y government properties ang maapil sa pagkuha.
Matud ni Gealon anha gihapon mag-opisina si Labella ug magbutang na lang sila og trapal sa sawog ug sa kisame aron malikayan ang disgrasya basin og dunay mangatagak nga tipaka gikan sa kisame. (/IBM)(BANATNEWS)