Habalhabal driver nga‘depress’, miambak sa taytayan

CEBU, Philippines – Nakamugna og panaghuot sa mga sakyanan sa Mactan-Mandaue Bridge dihang usa ka 23-anyos nga drayber sa habalhabal nga gituohang nawad-an sa maayong panghunahuna ang kalit lang miambak ngadto sa dagat sa habig sa Brgy. Looc, Dakbayan sa Mandaue, mga pasado alas 10 sa gabii niadtong Lunes.

Ang kapolisan sa Presinto 5 sa Mandaue City Police Office (MCPO) dali nga mihimo og pakisusi uban ang mga residente sa lugar.

Matud ni Police Staff Sergeant Randy Lozada, imbestigador sa kaso, ilang nasayran nga gikan sa tugpahanan ang biktima diin aduna kini gihatud nga pasahero.

Dugang nilang nasayran nga lumad nga taga Brgy. Cantao-an sa Dakbayan sa Naga ang maong lalaki.

Si Police Major Mercy Villaronga, ang information officer sa MCPO miingon nga naabtan sa kapolisan ang maong lalaki nga naglangoylangoy sa dagat human kini miambak og 200 metros nga gihabugon paingon sa dagat.

Gihangyo kini sa kapolisan ug sa mga residente nga mokawas na sa daplin sa Mactan Channel.

Dihang nahidangat na kini sa daplin, dali kining gitabang sa mga rescuer ug gipasakay sa patrol car ug gidala sa Mandaue City District Hospital aron matambalan ang mga bun-og niining naangkon sa iyang kalawasan.

Nabantayan nga ang maong lalaki daw nakasinati og nervous breakdown human kini mialegar nga adunay tawo nga nagsunod kaniya ug gusto siyang patyon.

Giasoy sa maong habalhabal driver nga gikan sa Dakbayan sa Naga, gisundan siya sa maong tawo.

Dihang paingon na siyang mouli gikan sa airport, nakadesisyon siyang molayat sa ubos sa taytayan aron makalingkawas sa tawong buot mopatay kaniya.

Gumikan sa kahimtang niini, gidala ang maong lalaki sa Vicente Sotto Memorial Medical Center alang sa psychiatric examination.

Nakig-alayon na ang MCPO sa Naga City Police Station aron mapahibawo ang pamilya sa kahimtang sa maong habalhabal driver.

Ang nakaila sa maong habalhabal driver mitug-an aduna kini problema sa relasyon human giingong gibuwagan sa iyang uyab nga maoy hinungdan nga nakasinati kini og depression. (Rowena D. Capistrano/DILT)(BANAT NEWS)