CEBU, Philippines — Nakalas ang usa ka sakop sa Philippine Army ug usa ka gidudahang rebeldeng sakop sa New Peoples Army sa nahitabong engkwentro human sa medical-dental mission sa kapolisan ug armadong kusog sa Barangay Bantolinao, Manjuyod, Negros Oriental niadtong Sabado sa gabii. Butyag pa sa direktor sa Police Regional Office-7 nga si Police Brigadier General Debold Sinas nga sayo sa buntag sa wala pa magsugod ang medical mission, nakadawat sila og report nga adunay itanom nga mga Iandmine sa kalsada nga ilang agian sa ilang pagpamauli.
Tungod niini, gisusi sa mga tropa ang dapit ug didto nakaplagan ang walo ka mga bangag sa kalsada nga adunay mga wires apan wala pa mabutang ang mga landmines. Nagtuo sila nga mga rebelde ang naghimo niadto apan nabaraw. Nasuta sab nila nga pipila ka adlaw sa wala pa ang medical mission ang kapolisan ug AFP nakadawat og impormasyong nag-checkpoint ang mga rebelde sa mga kalsada sa Bantolinao.
Tungod niini, gioktaba nila ang misyon apan surpresa silang nilahos sa lugar ug wa na makabantay ang mga rebelde. Nianang pagka- alas onse sa gabii samtang gilingaw-lingaw sa mga polis ang publiko pinaagi sa usa ka konsiyerto human sa medical mission, milusad og sekretong operasyon ang Philippine Army dili layo sa maong barangay.
Didto nadiskubrehan sa mga sundalo ang gikampohan sa mga NPA diha sa Sitio Kambugtong sa mao gihapong barangay ug nahitabo ang engkwentro sud sa 20 ka minutos. Atol sa engkwentro, nakabsan sa kinabuhi si Corporal Leoter Cagape samtang nasamdan ang laing tulo ka mga kauban niini.
Sa habig sa mga rebelde, usa ka wala mailhing lalaki ang napatay samtang nangikyas ang ubang mga kauban niini.
Na-recover ang usa ka gituohang wala pa makabuto nga landmine, mga gamit pangkabit niini, mga bala sa M16, ug ubang mga personal nga mga butang.
Nadiskubrehan sab didto ang pipila ka mga botelya sa mga juice nga maoy gipanghatag atol sa medical mission. Matud ni Sinas, nagpasabot lang nga apil sa naalagaran sa PNP ug AFP joint medical mission ang mga rebelde.
Ang commander sa 302nd Infantry Battalion sa Armed Forces of the Philippines (AFP) nga si Brigadier General Ignacio Madriaga nagkanayon nga naghiusa ang pwersa sa mga rebelde sa Negros Oriental ug sa Occidental aron babagan kadto nga medical mission.
“Usually hindi ganyan eh, nagtatawiran sila to address the situation…Our assessment is, murag na hurt sila sa massive medical and dental outreach (missions) kay that area, they considered it as their haven. Ang ilang pamakak sa mga tawo nga ang gobiyerno walay pakabana nila, ma expose ilang lies,” sigun sab ni Sinas. Matud ni Sinas magpadayon gihapon ang maong mga outreach programs sa PNP ug AFP sa Negros Oriental ug gikondenar niya ang suway nga pagpangsamok sa CPP-NPA sa maong mga programa.
Nakahimo na og medical ug dental mission ang PNP ug AFP sa Canlaon City ug Sta. Catalina sa Negros Oriental. (BANAT NEWS)