Kanhi priso gipatay, habal driver naangol
CEBU, Philippines — Nakabsan sa iyang kinabuhi ang kanhi piniriso human kini pusila sa riding-in-tandem samtang napagan ang habalhabal drayber sa may Brgy. Poblacion Ward 1 sa Lungsod sa Minglanilla mga alas nuybe sa gabii niadtong Miyerkules.
Ang namatay mao ang 35-anyos nga si Delfin Sidon nga taga Sitio Ingga Uyok sa Brgy. Tunghaan sa naasoy nga lungsod. Samtang ang naangol nga habalhabal driver mao ang 20-anyos nga si Ferlan Dublin, taga Brgy. Tungkop.
Asoy ni Police Staff Sergeant Wilfredo Dapa, desk officer sa Minglanilla Police Station nga nakadawat sila og tawag may kalabutan sa insidente sa pagpamusil.
Sa ilang inisyal nga imbistigasyon, nasuta nga naglingkod sa nakaparada nga motorsiklo si Sidon dihang gikalitan og pusil sa mga mamumuno nag-angkasay og motorsiklo.
Giingong nakadagan pa ang biktima apan padayon kining gipauwanan og bala sa riding-in-tandem hangtud nga nahagba. Samtang si Dublin nga naghuwat og pasahero, naigo sa iyang walang batiis.
Misibat dayon ang mga gunmen sa lugar human mamusil.
Gitabang sa medical team si Sidon ug gidala sa Minglanilla District Hospital apan nakabsan gyud kini sa iyang kinabuhi human kini makaangkon og tulo ka samad pinusilan sa iyang lawas.
Sa gihimong pakisusi sa kapolisan, ilang nasuta nga nadakpan na kaniadto ang biktima gumikan sa kaso sa ilegal nga drugas, kawat ug carnapping.
Gituohan sa mga awtoridad nga posibleng adunay naglagot sa biktima hinungdan nga kini gipatay.
Hinuon nagpadayon pa ang Minglanilla Police sa ilang imbestigasyon sa maong kaso. (DILT) (BANAT NEWS)
- Latest