Mokuha unta sa asawa gipatay
CEBU, Philippines — Wala na makaabot nga buhi ngadto sa iyang asawa ang usa ka lalaki sa Sitio Cantecson sa Brgy. Gairan sa Dakbayan sa Bogo kay samtang nagmaneho kini sa iyang motorsiklo, gipusil kini sa wala pa mailhing mamumuno pasado alas kwatro sa hapon kagahapon niadtong miaging adlaw.
Si Police Master Sergeant Victor Avenido sa Bogo City Police Station miila sa biktima nga si Glenn Ramirez Parasuela, 48-anyos, taga Brgy. Sto. Niño sa maong dakbayan.
Nasayran nga nagmaneho ang biktima sa iyang motorsiklo paingon sa Gairan Elementary School aron kuhaon ang iyang asawa nga magtutudlo sa nahisgutang tulunghaan.
Giingong gisundan og laing motorsiklo ang biktima nga giluwanan sa duha ka wala hiilhing mga lalaki ug ang backrider niini maoy mitira kang Parasuela, pipila ka metros ang gilay-on sa tunghaan.
Atol sa pagpamusil, atol nga adunay milabay nga cargo van, hinungdan nga naigo ang kilid niini. Gidudahang gitiwasan usab og pusil ang biktima dihang nahagba.
Napalgan sa crime scene ang pito ka kabhang sa 9mm nga armas nga gituohang gikan sa hinagiban sa mamumuno.
Dugang sa polis nga dugang imbestigasyon ang ilang gihimo karon alang sa pagsuta sa maong hitabo ingon man ang pag-ila sa nagpatay sa biktima. (DILT) (BANAT NEWS)
- Latest
