Badlungon nga CT-TODA enforcer taktakon

CEBU, Philippines – Dili magpanuko sa pagtaktak ang kadagkuan sa City of Talisay-Traffic Operation Development Authority (CT-TODA) sa mga badlungon nga traffic enforcers.

Kini ang gipahibawo ni Rogelio Villaver, ang pangu sa CT-TODA kagahapon sa buntag nga nahinabi sa mga tigbalita.

Una niini, si Mayor-elect Gerald Anthony “Samsam” Gullas niingon nga usa sa iyang prayoridad mao ang paghatag og kahapsay sa dagan sa trapiko sa dakbayan.

Aron matuman kini, laraw nila nga hatagan og saktong suholan ingon man benepisyo ang mga enforcers.

Sigon ni Villaver, lauman nga adunay dakung kausaban ilabi na sa pagbansay sa mga enforcers ug ang ilang batasan diha sa karsada. Human iyang nabantayan nga adunay mga tarong ingon man badlungon nga iyang mga sakop.

Gani iyang gitug-an nga nakadawat siya og mga report nga adunay mga pagpangwarta nga gihimo diin makigsabot ang mga drayber kanila aron makalingkawas sa kalapasan nga ilang nahimo sa dalan.

Mibahad si Villaver nga kon magpadayon kini ug iyang mapamatud-an, iyang taktakon sa serbisyo ang mga badlungong sakop sa CT-TODA. (/DILT)(BANAT NEWS)